ذرة امل
22 سنه هو عمري لسه بدري
حياتي بتبتدي زي أصحابي في نفس سني
تعب طبيعي جالي مره واحدة غصب عني
و وصف حالتي إني عندي سرطان جوا دمي
صدمه رهيبه من الذهول مقدرتش تاني افكر
معنوياتي محطمه تحت الصفر و أكتر
امل شفائي من المرض نسبة 5%
ممنوع عليا كل حاجة مع رعاية طبيه
أبدأ علاج كيماوي هد حيل بمعنى الكلمه
شعري بيقع شكلي اختلف مع جلسه ورا التانيه
الم رهيب لا يحتمل في كل حته في جسمي
بعدين جلسات اشعه نستني حتى اسمي
فضلت اهرب من ده كله بـإني أكتب و اغني
أدي الامل لحد غيري و تعبه نفس تعبي
عشان تتغلب على المرض لازم تفضل مكمل
ازرع في نفسك الأمل هترجع زي الأول
كل يوم بيعدي بحاول أبقى مبسوط
خايف من المستقبل صاحي أو نايم مهموم
حبيت الدنيا بس من حب الدنيا محروم
هواجه المرض بالأمل عشان من تاني اقوم
كل يوم بيعدي بحاول أبقى مبسوط
خايف من المستقبل صاحي أو نايم مهموم
حبيت الدنيا بس من حب الدنيا محروم
هواجه المرض بالأمل عشان من تاني اقوم
بسبب العلاج شكلي بقى متغير
سمعت ناس بتسخر و ناس تانيه بتهزر
و أنا ماشي حزين بسبب مرض متأثر
حواليا ناس كتير بس جوايا متغرب
خايف اقابل حد خايف أعمل اصحاب
عايش صامد مخبي جوا قلبي أسرار
بقارن نفسي بـالماضي نفسي أرجع من تاني
نفسي الناس تعاملني كأني إنسان عادي
نفسي احب بس المرض بوظ فيا ثقة نفسي
زهقت من نفسي بقالي كتير ماشي لوحدي
بدعي كل يوم عشان قالولي ده ابتلاء
يا رب احميني صبر اهلي عجل فيا الشفاء
شايف صوره ليا بس دلوقتي مرتبط بالأمل
إزاي احلم إزاي اضحك و أنا جوا المرض معتقل
لحد ما ذرة امل قوتني خلتني انتصر
حاربت المرض و الحياه في دمي بتنتشر
كل يوم بيعدي بحاول أبقى مبسوط
خايف من المستقبل صاحي أو نايم مهموم
حبيت الدنيا بس من حب الدنيا محروم
هواجه المرض بالأمل عشان من تاني اقوم
كل يوم بيعدي بحاول أبقى مبسوط
خايف من المستقبل صاحي أو نايم مهموم
حبيت الدنيا بس من حب الدنيا محروم
هواجه المرض بالأمل عشان من تاني اقوم
Commentaires
Enregistrer un commentaire